తెలంగాణకు వర్షాలు వాపసు రావాలి: కేసీఆర్

చిత్తశుద్ధి ఉంటే సాధించ లేనిదంటూ ఏమీలేదని సీఎం కల్వకుంట్ల చంద్రశేఖర్‌రావు స్పష్టం చేశారు. ఇవాళ మెదక్ జిల్లా నియోజకవర్గ స్థాయి సమీక్షా సమావేశంలో ఆయన ప్రసంగించారు. తెలంగాణను ఒక హరిత హారంగా మార్చుకోవాలని ప్రజలను సీఎం కోరారు. అడవులుంటే వర్షాలు వస్తాయని పేర్కొన్నారు. మనం మన రాష్ట్రంలో ప్రతి నియోజకవర్గంలో ఏడాదికి 40 లక్షల మొక్కలను నాటాలని విజ్ఞప్తి చేశారు. రాబోయే మూడేళ్లలో 230 కోట్ల మొక్కలను నాటాలని తెలిపారు. మొక్కలను పెంచడం ద్వారా తెలంగాణకు వర్షాలు వాపసు రావాలని అన్నారు. వర్షాలు కురిస్తే పంటలు పండి రైతులు ధనవంతులవుతారని రాష్ట్రం సుభిక్షంగా ఉంటుందని పేర్కొన్నారు.

రాష్ట్రంలో రిజర్వు ఫారెస్టులున్నా చెట్లు లేక వాతావరణ సమతౌల్యం దెబ్బతిందని పేర్కొన్నారు. చిత్త శుద్ధితో పనిచేస్తే తెలంగాణ హరితవనంగా మారుతుందని ధీమా వ్యక్తం చేశారు. తెలంగాణను హరితవనంగా మార్చేందుకు ప్రభుత్వం ప్రత్యేకంగా ప్రియాంకా వర్గిస్ అనే ఐఎఫ్‌ఎస్ అధికారిని నియమించుకుందని తెలిపారు. తాను లూథియానాకు వెళ్లినపుడు రోడ్డు పక్కన రకరకాల పండ్లు, పూల మొక్కలు చూసిని విషయాన్ని సీఎం గుర్తు చేసుకున్నారు. ఆ విధంగా నగరాన్ని తీర్చిదిద్దిన అధికారిని కేసీఆర్ అభినందించారు. ఇందుకు అధికారులు పూర్తి సహకారం అందించాలని విజ్ఞప్తి చేశారు. ఉద్యోగుల సంక్షేమానికి ప్రభుత్వం కట్టుబడి ఉందన్నారు. దేశంలో ఎక్కడాలేని విధంగా ఉద్యోగులకు హెల్త్ కార్డులు ఇస్తున్నామని వెల్లడించారు.